Azərbaycan Dünya Bankından böyük məbləğdə borc aldı

  Bölmə: İqtisadiyyat | 2142 | 13:46 21-12-2016

Dünya Bankının (DB) Direktorlar Şurası Trans-Anadolu Boru Kəməri (TANAP) layihəsinə 800 mln. ABŞ dolları kredit ayrılması ilə bağlı qərar qəbul edib. 

Oxu.Az “Report”a istinadən xəbər verir ki, kreditin 400 mln. dollarını Azərbaycan dövlətinin zəmanəti ilə “Cənub Qaz Dəhlizi” QSC (CQD), 400 mln. dollarını isə Türkiyə dövlətinin zəmanəti ilə bu ölkənin “BOTAŞ” şirkəti alıb. 

DB-in vitse-prezidenti Siril Muller (Cyril Muller) deyib ki, təmsil etdiyi qurum CQD-yə kredit ayırmaqdan məmnundur.

“TANAP rəqabətə şərait yaradacaq, habelə Azərbaycan və Türkiyə əhalisi üçün yeni iqtisadi imkanlar yaradacaq. O, həmçinin regional ticarəti, əlaqələrin inkişafını və Avropa və Türkiyədə enerji təhlükəsizliyinin təmin edilməsini dəstəkləyəcək”, - deyə Bank rəsmisi vurğulayıb.

Qeyd edək ki, TANAP ümumi uzunluğu 3500 km olan CQD layihəsinin 1850 km-lik hissəsini əhatə edir. 

CQD vasitəsilə ilkin olaraq ildə “Şahdəniz 2” yatağının 16 mlrd. kubmetr qazının Avropaya nəqli planlaşdırılır ki, onun 6 mlrd. kubmetri Türkiyəyə, digər 10 mlrd. kubmetri isə Avropa ölkələrinə satılacaq.

TANAP-ın 58%-lik səhmi Azərbaycan Dövlət Neft Şirkətinə (SOCAR), 30%-i “BOTAŞ”a, 12%-i BP-yə məxsusdur.

U.A.


Digər xəbərlər

0.35482501983643